O Consello da Xunta autorizou hoxe o convenio de colaboración entre a Consellería de Sanidade e a Universidade de Vigo para o control aerobiolóxico de Galicia. A tal efecto, o departamento sanitario galego destinará 174.240 euros no período 2025-2028.

Mediante a renovación desta colaboración establécense as condicións polas que se rexerá esta cooperación destinada á prestación do apoio técnico e desenvolvemento das actividades relacionadas co control aerobiolóxico na comunidade.

Segundo establece o convenio, a Universidade de Vigo comprométese, cunha frecuencia semanal, á recollida de mostras aeorobiolóxicas en catro estacións localizadas en Santiago de Compostela, Lugo, Ourense e Vigo, xa que a experiencia indica que o contido alerxénico é máis elevado nestas poboacións e a súa localización posibilita realizar extrapolacións de datos a outros territorios. 

Así mesmo, a Universidade de Vigo comprométese ao traslado e procesados das mostras validado pola Rede Española de Aeorobioloxía; á identificación e reconto dos tipos polínicos alergóxenos; ademais de remitir a información polínica á Dirección Xeral de Saúde Pública da Consellería de Sanidade.

De marzo a xullo achegarase a predición de concentración de pole durante o período principal de presenza do mesmo no ambiente e levarase a cabo o traballo de campo e a consulta das variables meteorolóxicas.

Con posterioridade, elaborarase unha memoria de resultados semestral e realizaranse as tarefas de difusión e produción científica dos resultados. A Consellería de Sanidade publicará a información recibida e procederá a valorala en termos de saúde. 

Cómpre remarcar que entre as competencias do departamento sanitario galego está o desenvolvemento de actuacións comunitarias para o control dos riscos de enfermar asociados aos determinantes de saúde. Entre estas actuacións está o control aerobiolóxico, polo seu grande interese clínico, debido á capacidade alerxénica do pole e a súa utilidade para coñecer a dinámica atmosférica das partículas biolóxicas.

Rede Galega de Aerobioloxía

Na última década, levouse a cabo a monitorización do pole presente na atmosfera galega, tanto por motivos sanitarios como medioambientais, para coñecer a dinámica das partículas. 

Como resultado dos convenios de colaboración anteriores entre a Universidade de Vigo e a Consellería de Sanidade, creouse a Rede Galega de Aerobioloxía, que conta cunha serie de captadores de control aerobiolóxico que permiten a elaboración de mapas, informes e predicións do contido polínico atmosférico en Galicia. 

Nos últimos anos, o cambio climático afecta á exposición ao pole e á sensibilización alérxica de varias maneiras, como é no caso  do cambio e da prolongación da tempada do pole, na concentración e alerxenicidade, así como na súa distribución xeográfica. Por todas estas razóns, tanto a Consellería de Sanidade como a Universidade de Vigo consideran moi necesario continuar traballando conxuntamente nesta materia.