​

O conselleiro de Sanidade, Antonio Gómez Caamaño, visitou hoxe o laboratorio de saúde pública de Galicia, do que salientou a súa actividade de protección sanitaria, xa que o pasado ano analizou máis de 15.000 mostras das que o 60 % se corresponden con análises relacionadas coa seguridade alimentaria.

O titular da carteira sanitaria estivo acompañado na visita polo delegado territorial da Xunta en Lugo, Javier Arias Fouz; pola directora xeral de Saúde Pública, Carmen Durán; e polo xerente da área sanitaria, Ramón Ares.

O conselleiro dixo que este laboratorio é referente no eido da saúde pública en España, sendo o gran centro de operacións desde o que se protexe a saúde da cidadanía galega nos ámbitos da seguridade alimentaria e ambiental.

Incidiu en que a Xunta apostou por Lugo para ter esta infraestrutura, logo dun investimento de preto de 5 millóns de euros no laboratorio provincial. Deste xeito, multiplicouse a súa capacidade analítica e o converteu no Laboratorio de Saúde Pública de Galicia, co obxectivo de protexer con maior eficacia a saúde da cidadanía.

Optimización dos seus servizos

Tal e como detallou o conselleiro, a Xunta segue a optimizar os servizos do laboratorio, integrando as unidades analíticas de detección da triquina dos matadoiros e sendo referencia en Galicia para as análises do Plan Nacional de investigación de Residuos en produtos de orixe animal e vexetal. Ademais, mantén alianzas con outros laboratorios de saúde pública de España.

Xunto ao anterior, o laboratorio comezou a traballar na biomonitorización humana para estimar a concentración de substancias químicas no organismo, avaliando a eficacia de políticas ambientais e, deste xeito, protexer grupos vulnerables como mulleres embarazadas, nenos e maiores.

Tamén comezou a unir esforzos cos laboratorios de microbioloxía das áreas sanitarias para a secuenciación de microorganismos detectados en mostras ambientais e alimentarias, o que se relaciona con gromos alimentarios ou de lexionella.

En consecuencia, concluíu Gómez Caamaño, a Xunta conta cunha infraestrutura e un equipo excepcional para proporcionar datos e información a través da análise da calidade das augas para o consumo e as de baño; a investigación da existencia de residuos como praguicidas ou hidrocarburos nos alimentos; a análise de restos de medicamentos en produtos de orixe animal ou no control da presenza de alérxenos nos alimentos.​