A Consellería de Sanidade vén de estender o ensaio clínico SINCIGAL a toda a poboación maior de 18 anos co obxectivo de avaliar a redución de ingresos hospitalarios na poboación galega mediante a vacinación fronte ao virus respiratorio sincitial, VRS.

O estudo, que na súa primeira fase estaba destinado ás persoas maiores de 60 anos, amplíase agora á poboación maior de idade dando prioridade aos grupos de risco, entre os que se inclúen os profesionais dos centros sanitarios por mor do seu maior nivel de exposición a este virus.

Ata o vindeiro 31 de xaneiro estarán activas as unidades de participación en todos os centros de saúde participantes, cotando cunha ampla cobertura territorio. 

Ademais, continúan activas as unidades en todos os centros de saúde participantes, cunha ampla cobertura territorial. Na seguinte ligazón pódese consultar a lista de centros activos en www.sincigal.com ou chamar ao teléfono gratuíto 900 842 217 para información.

A vacina que se está a estudar (Abrysvo®) está  autorizada e comercializada, e o ensaio permite avaliar a súa eficacia na vida real para previr hospitalizacións por infección por VRS e complicacións asociadas. Así, a Dirección Xeral de Saúde Pública convida a toda  poboación maior de idade a participar neste iniciativa que están a desenvolver a Consellería de Sanidade e a Fundación Pública Galega Instituto de Investigación Sanitaria de Santiago de Compostela (IDIS). 

Posibilidade de vacinación

No caso de aceptar participar, terá un 50 % de posibilidades de recibir a vacina obxecto de estudo ou non, isto virá determinado polo azar a través dunha plataforma informática. 

Desta forma, poderá comprobarse as diferenzas entre as persoas vacinadas e non vacinadas fronte a un virus que, na maioría dos casos, provoca síntomas leves similares a un arrefriado pero que en adultos de idade avanzada ou persoas con patoloxías crónicas pode causar problemas pulmonares graves.

No caso de ser asignado ao grupo de vacinación procederase á administración da vacina durante esa mesma asistencia sanitaria ou nunha quenda posterior, como prefira o participante. Como acontece con todas as demais vacinas, verificarase que non existan contraindicacións para a vacinación. 

No caso de ser asignado ao grupo que non reciba a vacina, non se realizará ningún procedemento adicional asociado á participación no estudo. 

O estudo non implica acudir a ningún seguimento clínico, xa que se obterá a información necesaria da historia clínica de cada paciente para realizar o seguimento de eficacia e seguridade, polo que non será necesario contactar de novo co participante.

 Vacinación extraordinaria da gripe

Durante esta fin de semana a Xunta convocou a máis de 73.600 persoas maiores de 60 anos para que poidan inmunizarse fronte á gripe nos recintos hospitalarios públicos, nunhas novas xornadas extraordinarias de vacinación organizadas pola Consellería de Sanidade para incrementar os niveis de protección da poboación e na que estas persoas tamén poderán aproveitar para participar, se así o desexan, no ensaio clínico Sincigal. 

Estas xornadas extraordinarias de vacinación realizaranse o sábado en horario de 10 a 14 horas e de 16 a 20 horas nos hospitais comarcais e principais das sete áreas sanitarias. No caso dos hospitais principais, a vacinación prolongarase durante a xornada do domingo, no mesmo horario de mañá e de tarde.

​

As persoas que formen parte desa franxa de idade da poboación diana recibirán unha mensaxe de texto da Consellería de Sanidade, indicando a marxe horaria e o centro ao que teñen que asistir. 

A día de hoxe xa foron vacinadas da gripe máis de 838.000 persoas, mentres que a porcentaxe dos maiores de 60 anos xa supera o 65 %. 

A comunidade galega está preparada para afrontar esta nova temporada e, desde mediados de novembro, ten operativo o Plan de inverno para anticiparse, previr, planificar e xestionar os recursos que permitan responder aos picos de demanda.