Programa que ten como obxectivo xeral realizar accións de sensibilización, prevención, detección precoz, coordinación e intervención dende unha perspectiva integral para previr e atender a conduta suicida, así como realizar accións de posvención en superviventes.

Programa de intervención integral con persoas con diagnóstico de Trastorno de Personalidade (TP), baseado no achegamento aos recursos dispoñibles dentro da comunidade e no tecido de redes de acompañamento e solución de problemas que poden derivar da súa patoloxía.

Programa destinado a dar resposta á poboación con enfermidade mental, ás súas familias e achegados, internos no Centro Penitenciario de A Lama, atendendo á natureza e ás necesidades específicas deste centro.

Programa que proporciona información, asesoramento e apoio individualizado sobre saúde mental, así como recursos e servizos relacioados, tanto a persoas con problemas de saúde mental como ás súas famlias, persoas achegadas e profesionais.

Programa que pretende favorecer a calidade da convivencia familiar a través de actividades para o desfrute do tempo de lecer, proporcionando oportunidades de respiro ás persas con enfermidade mental grave ou persistente e aos familiares cos que conviven.

Programa de atención sociosanitaria en domicilio dirixido a persoas con enfermidade mental grave, onde se promove a autonomía persoal e o apoio psicolóxicos destas e dos seus familiares, así como a coordinación con outros servizos comunitarios.
É un programa que reforza á deficitaria atención que recibe o colectivo de persoas con enfermidade mental tamén no medio rural a causa do insuficiente desenvolvemento dos recursos de atención comunitaria en Galicia.

Programa que presenta dúas liñas de actuación:
- Acompañamento de persoas con problemas de saúde mental ex-xudicializadas, a través da derivación de casos dende os servizos sociais do centro penal ou CIS Carmen Avendaño.
- Formación de axentes sociais e corpos de seguridade: dirixida a axentes xudiciais (xuíces, fiscais e avogados/as), persoal dos corpos de seguridade do estado, así como a axentes sociais implicados na inserción pero que non pertencen á rede de FEAFES Saúde mental (persoal da sunidades de traballo social dos concellos, orientadores/as laborais das oficinas de emprego, asociacións da rede comunitaria,..).

Programa encamiñado a favorecer a continuidade e a proximidade na atención ás persoas con enfermidade mental crónica e o desenvolvemento da súa autonomía persoal, ademais de favorecer as capacidades das persoas coidadoras no manexo de determinadas situacións tanto intrafamiliares como persoais.

O CRPL Lenda defínese como un recurso de atención diúrna en réxime ambulatorio que ofrece unha serie de programas encamiñados á rehabilitación psicosocial e laboral das persoas con enfermidade mental, á súa integración social e á mellora do funcionamento persoal, familiar, laboral e de socialización.
Os programas contemplados no CPRL Lenda baséanse en estratexias dirixidas a que as persoas usuarias adquiran e/ou recuperen aquelas habilidades que lles permitan desenvolverse no seu medio social de forma autónoma, cos menos apoios posibles e cunha mellora na súa calidade de vida.

O Centro Ocupacional Lenda defínese como un servizo de atención diúrna ocupacional de media estadía e constitúe un conxunto de actuacións dirixidas ás persoas dependentes que, residindo nos seus propios fogares, precisen dunha serie de coidados e atencións de carácter persoal, social e ocupacional, orientadas de xeito principal á preparación e integración laboral, e á promoción da súa autonomía persoal.