Este roteiro circular, empeza e remata na Praza do Barquilleiro, no pobo de Parada de Sil. Debido á proximidade da Praza do Barquilleiro e Fondo de Vila, pódese dividir o roteiro en dous tramos tamén circulares mediante unha variante. Isto permite reducir o percorrido á metade.
O carreiro transcorre maioritariamente por camiños de carro, entre muros, que percorren a paisaxe do bordo do canón, entre unha abundante vexetación onde predominan os carballos e os castiñeiros.
Boa parte do percorrido realízase de maneira paralela ao Río Sil, e atoparemos varios miradoiros no percorrido, o que nos permitirá gozar das espectaculares vistas, e dos tradicionais viñedos dispostos nas paredes do canón.
Un dos puntos máis interesantes do percorrido é o Mosteiro de Santa Cristina, que se atopa escondido no medio dun bosque de castiñeiros.