Partindo das proximidades dun lavadoiro na aldea da Teixeira, o camiño diríxese a Cristosende entre muros de pedra e cuberto por un bosque autóctono bastante denso de carballos e castiñeiros. A paisaxe ábrese ao achegarse a Cristosende, onde os viñedos substitúen á foresta.
Descendendo entre bancales, o roteiro aproxímase ao río Mao onde, mediante unha derivación, pódese conectar co carreiro PR-G 177. Seguindo a pista polo trazado principal, gózase das fermosas vistas sobre o río Sil e o seu canón.
A senda abandona o Sil na desaparecida poboación de Fontao e xira cara ás ladeiras do leito do río Edo. Un sinal indica o acceso ao miradoiro da Pena do Curvo, cunha ampla panorámica sobre a confluencia dos ríos Edo e Sil. Seguindo o itinerario, ao entrar na Portela, abandónase a pista ancha e toman a substitución os camiños estreitos, entre muros e viñedos. A ascensión pasa pola Cruz e un miradoiro sobre Lumeares, para concluír novamente na Teixeira.