​

Coincidindo coa celebración do Día Mundial contra o cancro de colon, que se celebra hoxe, a Consellería de Sanidade e a Asociación Española contra o Cancro (AECC) asinaron esta mañá un protocolo de colaboración para o impulso e seguimento de plans de prevención, detección temperá e apoio a persoas afectadas por cancro.

O protocolo asinado polo conselleiro de Sanidade, Antonio Gómez Caamaño, e polo representante autonómico da asociación e presidente provincial de Ourense, Germán Rodríguez-Saa. Na sinatura estiveron presentes, así mesmo, a directora xeral de Saúde Pública, Carmen Durán, e os presidentes provincias da Asociación Española contra o Cancro na Coruña, Manuel Aguilar; en Lugo, José Manuel Rozas; e en Pontevedra, Blanca García.

Tal e como se recolle no documento asinado, ambas as institucións comprométense a impulsar campañas de educación e concienciación dirixidas á poboación, promovendo hábitos de vida saudables, como a alimentación equilibrada, a actividade física regular, a eliminación do tabaco e a redución do consumo de alcol, para reducir o risco de cancro e mellorar a recuperación das persoas afectadas.

Así mesmo, a Consellería de Sanidade e a AECC colaborarán no desenvolvemento e seguimento dos programas de detección temperá para distintos tipos de cancro, que leva a cabo a Dirección Xeral de Saúde Pública, facilitando recursos e información á cidadanía.

Xunto ao anterior, a cooperación estenderase no ofrecemento de apoio psicolóxico e social orientado á recuperación das persoas diagnosticadas con cancro e ás súas familias, creando espazos de acompañamento, asistencia e actividades de promoción de benestar físico e mental.

A colaboración abrangue tamén a promoción da formación do persoal sanitario e outros profesionais en relación á prevención, detección e apoio integral no ámbito oncolóxico, como parte do plan de tratamento e recuperación.

O departamento sanitario galego e a Asociación Española contra o Cancro fomentarán, ademais, a participación en proxectos de investigación e innovación en oncoloxía, destinados a mellorar a prevención, o diagnóstico e o tratamento do cancro.

As condicións particulares relativas á organización e execución de accións concretas resultantes desta cooperación serán establecidas para cada caso particular nos convenios específicos correspondentes.

O presente protocolo ten unha duración de catro anos, prorrogables mediante addenda que subscribirán as partes a tales efectos. 

Programa galego cancro colorrectal

Hoxe celébrase o Día Mundial para a prevención do cancro de colon. Galicia conta dende 2013 cun programa de detección precoz de cancro colorrectal que coordina a Dirección Xeral de Saúde Pública e que leva diagnosticados, ata decembro de 2023, un total de 2.618 cancros, dos que o 65 % estaban en fase inicial, mellorando as posibilidades de tratamento e supervivencia dos pacientes.

O programa iniciouse na área de Ferrol no ano 2013 e na actualidade está implantado en toda Galicia. En xullo do ano 2019 completouse unha rolda de cribado en todas as áreas sanitarias, co que a Xunta foi pioneira e adiantouse cinco anos ao obxectivo fixado polo Ministerio de Sanidade, que propoñía rematar a súa extensión no ano 2024.

Desde o inicio deste programa, o Goberno galego enviou 2.600.929 invitacións a participar, o que supón preto dun 99 % de homes e mulleres de 50 a 69 anos. En concreto, o número de invitacións a participar no pasado ano foi de preto de 270.000.

Nos últimos anos rexístrase unha tendencia ascendente na participación, de xeito que no 2023 superou o 54 % como consecuencia, en parte, do cambio de estratexia do programa, que pasou no 2022 a enviar directamente os tests aos domicilios. Cómpre incidir, tamén, que a participación no programa galego é superior á media nacional.