No marco das "Actuacións da Xunta de Galicia fronte aos posibles efectos das altas temperaturas sobre a saúde", o Goberno galego informa que pasa a nivel 2 (laranxa) a zona de Valdeorras que onte tiña nivel 3 (vermello).

Os niveis de alerta para hoxe das diferentes zonas son:

Nivel 2 (laranxa): Sur de Lugo, Montaña de Ourense e Valdeorras.

Nivel 1 (amarelo): Noroeste de Ourense e Miño de Ourense

Os concellos que abranguen as zonas en alerta:

Provincia de Lugo

Sur de Lugo (Bóveda, Carballedo, Chantada, Monforte de Lemos, Pantón, A Pobra do Brollón, Quiroga, Ribas de Sil, O Saviñao, Sober e Taboada).

Provincia de Ourense

Miño de Ourense (A Arnoia, Barbadás, Beade, Carballeda de Avia, Cartelle, Castrelo de Miño, Cenlle, Cortegada, Leiro, Melón, Nogueira de Ramuín, Ourense, Padrenda, O Pereiro de Aguiar, Pontedeva, Punxín, Ribadavia, San Amaro, San Cibrao das Viñas, Taboadela e Toén).

Noroeste de Ourense (Amoeiro, Avión, Beariz, Boborás, O Carballiño, Coles, O Irixo, Maside, A Peroxa, Piñor, San Cristovo de Cea e Vilamarín).

Montaña de Ourense (O Bolo, Carballeda de Valdeorras, Castro Caldelas, Chandrexa de Queixa, Esgos, A Gudiña, Maceda, Manzaneda, A Mezquita, Montederramo, Parada de Sil, A Pobra de Trives, San Xoán de Río, Riós, A Teixeira, A Veiga, Viana do Bolo, Vilariño de Conso e Xunqueira de Espadanedo).

Valdeorras (O Barco de Valdeorras, Larouco, Petín, A Rúa, Rubiá e Vilamartín de Valdeorras).​

Suspensión da actividade deportiva

A Xunta, a través da Secretaría Xeral para o Deporte, determinou a suspensión da actividade deportiva federada no exterior ata as 21,00 horas de hoxe en concellos do sur de Lugo e da montaña de Ourense, así como en Valdeorras, por mor da alerta por episodio de calor. Quedan permitidas as actividades acuáticas, coa recomendación de que non se realicen nas horas centrais do día, é dicir, de 12,00 a 17,00 horas. 

Recomendacións xerais para a poboación

A Consellería de Sanidade sinala que os principais grupos de risco ante os efectos da calor son: persoas maiores de 65 anos e nenos menores de catro anos, sobre todo os menores dun ano; persoas que padecen patoloxías: enfermidades cardiovasculares, diabetes mellitus, enfermidade pulmonar obstrutiva crónica, insuficiencia renal,  párkinson, Alzheimer ou patoloxías similares, e enfermidade psiquiátrica.

Tamén son grupos de risco as persoas que tomen determinados fármacos, diuréticos, consumo importante de alcol, etc.; e persoas en determinadas situacións: maiores que viven sós, persoas de risco que viven en vivendas mal acondicionadas, persoas con exceso de peso ou peso excesivamente baixo, traballadores, deportistas ou aquelas que pasan varias horas en exteriores, etc.

Fronte ás altas temperaturas, Sanidade lembra os principais consellos e recomendacións que debe seguir a poboación:

Beber máis líquidos sen esperar a ter sede; evitar bebidas quentes, alcohólicas, café, té ou cola e as moi azucradas; aumentar o consumo de ensaladas, verduras e froitas; e, tamén, evitar as comidas copiosas.

Igualmente é recomendable usar roupa de tecidos naturais, lixeira e folgada e cremas protectoras solares, así como calzado fresco; permanecer en espazos ventilados ou acondicionados e estar á sombra; utilizando as habitacións máis frescas da vivenda; durante o día baixar as persianas e pechar as xanelas e abrilas pola noite para ventilar.

Evitaranse as actividades ao aire libre nas horas de máis calor e reducirase a actividade física; e cando se estacione o coche, non deixar no interior nenos, nin anciáns coas xanelas pechadas.