Ir o contido principal

A XUNTA INVISTE MÁIS DE 544.000 PARA A VIXILANCIA DAS CARRACHAS E DOS MOSQUITOS EN COLABORACIÓN COAS UNIVERSIDADES DE SANTIAGO DE COMPOSTELA E DE VIGO

Imaxe
Mosquito_tigre_20250724143126.png

A Xunta vai investir 544.500 euros para a vixilancia das carrachas e dos mosquitos, potenciais transmisores de enfermidade humana e animal, en colaboración coas universidades de Santiago de Compostela e de Vigo. 

A tal efecto, o conselleiro de Sanidade, Antonio Gómez Caamaño; a conselleira de Medio Rural, María José Gómez Rodríguez; o reitor da Universidade de Santiago de Compostela, Antonio López Díaz; e o reitor da Universidade de Vigo, Manuel Reigosa Roger, asinaron o correspondente convenio de colaboración enmarcado na Rede galega de vixilancia de vectores Regavivec, que naceu no ano 2017.

Este novo convenio, que estará vixente ata abril de 2028, permitirá detectar a presenza de novos xéneros e especies das carrachas e dos mosquitos, determinar densidades elevadas ou zonas con aumento de vectores de enfermidades de importancia na saúde pública, e posibilitará tomar medidas de control de xeito urxente e informar a poboación dos riscos a que pode estar exposta.

Desde o punto de vista da saúde pública e da sanidade animal, é importante que exista unha rede para vixiar os animais transmisores de enfermidades, considerados vectores de interese sanitario. Con esa finalidade púxose en marcha a Rede galega de vixilancia de vectores a partir do convenio subscrito entre as consellerías de Sanidade e do Medio Rural e as universidades de Santiago de Compostela e de Vigo, que inicialmente se centrou nos mosquitos e no ano 2018 se ampliou ás carrachas. 

Este convenio, financiado polo departamento sanitario galego, enmárcase dentro da Estratexia galega de saúde 2030 e incorpora o enfoque Unha soa saúde, que busca equilibrar e optimizar de xeito sustentable a saúde das persoas, dos animais e dos ecosistemas. 

Actividades a desenvolver

Tal e como se recolle no convenio, a Universidade de Santiago de Compostela comprométese a aumentar o coñecemento sobre as carrachas, que son vectores de interese para a saúde humana e a sanidade ambiental. Para tal fin, revisaranse e actualizaranse os protocolos para a súa recollida, tanto no medio como en animais e humanos, considerando os avances na materia, a evidencia científica e as recomendacións de organismos nacionais e internacionais.

As carrachas son vectores de enfermidades como a anaplasmose, febre Q, enfermidade de Lyme, febre exantemática mediterránea, erliquiose, etc. O cambio climático é un dos factores da súa expansión, o que pode producir que se introduzan en Galicia especies que neste momento non se atopan.

O departamento de Patoloxía Animal da Universidade de Santiago de Compostela conta con tres liñas de investigación co obxectivo de realizar estudos sobre ectoparásitos e a súa infestación por diversos microorganismos de interese humano e animal, e con ampla experiencia no eido das carrachas.

Respecto da Universidade de Vigo, comprométese a aumentar o coñecemento sobre os mosquitos vectores de interese para a saúde humana e a sanidade animal na comunidade. A tal efecto, revisará e actualizará os protocolos para a posta de trampas, o seu mantemento e recollida de mostras e procederá ao traslado, procesado, identificación e reconto das mostras recollidas.

Como efectos do cambio climático, especies de mosquitos que neste momento non se atopan en Galicia poderían introducirse e instalarse na comunidade, favorecendo a aparición de casos autóctonos de enfermidades como o dengue, zika ou chikungunya, no caso dos humanos.

O departamento de Ecoloxía Animal da Universidade de Vigo conta cunha liña de investigación específica sobre o estudo da biodiversidade, co obxectivo de realizar, entre outros, traballos sobre fauna entomolóxica invasora, con ampla experiencia.

Pola súa banda, a Consellería de Sanidade, ademais da achega económica, realizará as xestións para poder levar a cabo as mostraxes nos puntos de maior interese, establecendo colaboracións ou acordos con entidades locais e actualizará as bases de datos de especies vectoriais transmisoras para a súa inclusión no Observatorio de Saúde Pública. Así mesmo, realizará a vixilancia ambiental e epidemiolóxica en función dos achados.

No que atinxe á Consellería do Medio Rural, enviará as carrachas que se atopen en xabarís ou noutros animais salvaxes no marco do seu programa de control de determinadas enfermidades animais e levará a cabo as xestións para poder realizar as mostraxes nos puntos de maior interese, para o que poderán establecerse acordos con asociacións de gandeiros. 

Tamén compartirá coa Consellería de Sanidade os resultados de interese en saúde pública nos seus programas de vixilancia e campañas de saneamento. As dúas consellerías colaborarán no estudo daquelas enfermidades de transmisión vectorial comúns a animais e humanos.