A Xunta de Galicia lembra á poboación da necesidade de adoptar medidas de protección para protexerse dos riscos asociados á inhalación do fume e as cinzas procedentes dos incendios forestais.

Malia que as recomendacións son válidas para toda a poboación, as persoas que pertenzan aos grupos máis vulnerables -nenos, embarazadas e persoas con enfermidades pulmonares ou cardíacas- deben prestar máis atención a este consellos.

Así, naquelas zonas onde se estean rexistrando incendios e, namentres a calidade do aire non sexa óptima, a Dirección Xeral de Saúde Pública recomenda:

-Limitar ao máximo as estadías no exterior e evitar realizar actividade física ao aire libre. 

-De necesitar saír ao exterior, empregar máscaras filtrantes mínimo FFP2, xa que aínda que non evitan o paso dos gases e das partículas de menor tamaño, si reteñen as partículas máis grandes. Se é posible, empregar gafas para protexer tamén os ollos de irritacións oculares.

-Recoméndase permanecer dentro da casa, manter o aire interior tan limpo como sexa posible e pechar portas e fiestras. 

-En caso de dispoñer de aire acondicionado, recoméndase utilizalo, preferentemente con filtros de alta eficiencia que permitan captar as partículas finas do fume. Se o sistema conta cunha entrada de aire fresco, débese colocar en modo de recirculación ou pechar o regulador de toma de aire exterior. Unha boa medida para manter limpo o aire da casa é a utilización dun purificador de aire portátil.

-Non utilizar elementos que poidan incrementar a contaminación do aire en interiores, como candeas, e evitar fumar.

-Ao proceder á limpeza das cinzas é importante extremar as precaucións. Recoméndase o uso de máscara, luvas, roupa de manga longa, pantalóns longos, zapatos e calcetíns para protexer a pel, así como o uso de gafas para protexer os ollos.

-En caso de contacto das cinzas, lavar as zonas expostas da pel, ollos ou na boca o antes posible. 

-Manterse ao tanto das mensaxes de emerxencias sobre as medidas adicionais de seguridade. 

Ligazóns de interese

A calidade do aire en Galicia pode consultarse a través da web de MeteoGalicia, onde se informa do índice de calidade do aire (ICA).  Calidade do aire en Galicia - MeteoGalicia 

Por outra banda, ante posibles interrupcións no subministro eléctrico, recoméndase seguir en todo momento as indicacións das autoridades sanitarias respecto á auga de consumo e á seguridade alimentaria. 

Máis información na páxina web da Consellería de Sanidade​.