​

A Consellería de Sanidade publica hoxe, no Portal de Contratos de Galicia​, a licitación, por 236.966,40 euros, dos servizos de mantemento preventivo e correctivo e de actualización tecnolóxica dos equipos instalados no Laboratorio de Saúde Pública de Galicia.

O obxectivo é incrementar a dispoñibilidade do equipamento, reducir o impacto das avarías sobre a actividade do laboratorio e prolongar a súa vida útil. Mantéñense tamén parámetros de seguridade respectando a normativa vixente e na liña de acadar unha nova acreditación de calidade ante a Entidade Nacional de Acreditación (ENAC). 

De feito, en 1998, o laboratorio situado na cidade de Lugo foi o primeiro de España en conseguir a acreditación pola ENAC, segundo a norma UNE-EN ESO/IEC 17025, para a realización de ensaios de produtos agroalimentarios e auga.

O equipamento do Laboratorio de Saúde Pública de Galicia permitiu analizar en 2024 máis de 15.000 mostras para protexer a saúde da cidadanía nos ámbitos da seguridade alimentaria e ambiental.

Así, son analizadas mostras de augas de consumo humano ou de zonas de baño, ademais de vixiar a seguridade de alimentos como moluscos, comidas preparadas ou mostras de carne procedentes de matadoiros.

O contrato ten unha duración de dous anos e prevé unha posible prórroga de tres anos máis. As empresas interesadas nesta contratación teñen até o 5 de maio para presentar as súas ofertas.