A Xunta, a través da Consellería de Sanidade, publica no Portal de Contratos Públicos de Galicia​, a licitación, por 494.406 euros, da subministración sucesiva de dispositivos autotoma para a recollida de material celular da vaxina para o programa de cribado poboacional de cancro de cérvix.

Adquiriranse 180.000 dispositivos ata 2029 para as mulleres que conformar a poboación diana deste cribado, de 30 a 65 anos. 

Esta proba presenta unha maior sensibilidade que a citoloxía para a detección de lesións premalignas e ten un mellor valor preditivo negativo, é dicir, as mulleres con resultado negativo presentan un risco moi baixo de presentar cancro. Isto permite que o intervalo entre os cribados sexa de cinco anos. 

A participación no programa, que tamén se pode escoller coa recollida de mostra por parte da matrona, facilita a detección precoz de cancros que se manifestan despois dun longo período de latencia tras a infección polo virus do papiloma humano (VPH), que é unha das enfermidades de transmisión sexual máis frecuente. 

Ademais da vacinación a nenas e nenos fronte ao VPH, a Consellería de Sanidade puxo en marcha o programa de detección precoz de cancro de cérvix e, ata decembro de 2024, a participación efectiva acadou o 60 %, diagnosticándose un total de 63 cancros. 

Así, do conxunto de lesións detectadas, o 88 % presentaron un estadio I e II. 

As empresas interesadas neste contrato dispoñen ata o 16 de xaneiro de 2026 para presentar as súas ofertas.